نیویارک کی پاکستانی کمیونٹی کا ارشد شریف کی شہادت پر اظہار تعزیت

نیویارک ( اردو نیوز ) نیویارک کی پاکستانی امریکن کمیونٹی نے سینئر صحافی ارشد شریف کی شہادت پر گہرے دکھ اور غم کا اظہار کیا ہے اور سوگوار خاندان سے مکمل یکجہتی کا اظہار کرتے ہوئے کہا ہے کہ ارشد شریف حق اور سچ کا جھنڈا بلند رکھنے والے جرات مند صحافی تھے جن کی خدمات کو ہمیشہ یاد رکھا جائیگا۔

پاکستانی امریکن کمیونٹی کی ایک نمائندہ تنظیم ” پاکستانی امریکن کمیونٹی ایکسی لینس “ (پیس ۔PACE) کے سعید حسن کے زیر اہتمام ارشد شریف کی یاد میں منعقدہ تعزیتی اجلاس میں سینئر صحافیوں جہانگیر خٹک ، آصف جمال ، محسن ظہیر کے علاوہ کمیونٹی قائدین بشیر قمر، وکیل انصاری سمیت کمیونٹی کی مختلف شعبہ ہائے زندگی سے تعلق رکھنے والی اہم شخصیات اور ارکان نے شرکت کی ۔

سعید حسن کا کہنا تھا کہ نیویارک میں تعزیتی اجلاس منعقد کرنے کا مقصد ارشد شریف مرحوم کے سوگوار خاندان کو یہ پیغام دینا ہے کہ امریکہ میں بسنے والی کمیونٹی ان کے غم میں برابر کی شریک ہے ۔

سینئر صحافیوں جہانگیر خٹک اور آصف جمال کا کہنا تھا کہ ہم ارشد شریف کی شہادت کی شدید الفاظ میں مذمت کرتے ہیں اور مطالبہ کرتے ہیں کہ ان کے سفاکانہ قتل کی شفاف تحقیقات کروا ئی جائے ۔

کمیونٹی قائدین بشیرقمر، وکیل انصاری سمیت تعزیتی اجلاس میں شریک دیگر کا کہنا تھا کہ ارشد شریف نے اپنے خون سے تاریخ رقم کی ۔ ان کا خون رائیگاں نہیں جائے گا۔کمیونٹی قائدین کا کہناتھا کہ ارشد شریف ، اپنی جرات اور بہادری سے صحافت کے شعبے میں جو میراث چھوڑی ہے ، اس آگے بڑھانا ہوگا ۔

نیویارک کے علاوہ امریکہ بھر میں بسنے والی پاکستانی امریکن کمیونٹی کی جانب سے ارشد شریف کی شہادت پر اظہار افسوس اور اظہار تعزیت کا سلسلہ جاری ہے ۔