امریکہ میں دھرتی ماں پاکستان کا وقار ہر وقت بلند رکھیں ؛ سفیر جلیل عباس جیلانی

 

نیو یارک(خصوصی رپورٹ)امریکہ میں پاکستان کے نئے سفیر جلیل عباس جیلانی نے سفارتی ذمہ داریاں سنبھالنے کے بعد پہلی مرتبہ نیو یارک کا باقاعدہ دورہ کیا۔ اس دوران انہوں نے جہاں مختلف امریکی اداروں اور تھنک ٹینکس سے ملاقاتیں رہیں انہوں نے پاکستانی امریکن میڈیا سے تفصیلی ملاقات کے ساتھ ساتھ قونصلیٹ میں پاکستانی کمیونٹی کے اعزاز میں دئیے گئے استقبالیہ میں بھی شرکت کی۔ انہوں نے صحافیوں اور کمیونٹی سے خطاب کے دوران پاکستان میں جاری دہشت گردی کے خلاف جاری آپریشن ضرب عضب کے حوالے سے کہاکہ فوج اور حکومت کا مشن صرف اور صرف دہشت گردی کا خاتمہ ہے اور پوری قوم اس مسئلہ پر فوج اور حکومت کے ساتھ ہے انہوں نے کہا کہ آئی ڈی پیز کے مسئلہ سے انتہائی سنجیدگی سے نمٹا جا رہا ہے حکومت بے گھر افراد کو ہر ممکن مدد فراہم کرے گی۔ اس سلسلے میں امریکہ بھی ہماری بھر پور مدد کر رہا ہے۔ انہوں نے کہا کہ کمیونٹی سے ملاقات کا مقصد سفارتخانے اور کمیونٹی کے درمیان تعاون میں اضافہ ہے اور رابطے آئندہ بھی جاری رہیں گے۔ سفیر جلیل عباس جیلانی کے ہمراہ قونصل جنرل راجہ علی اعجاز بھی موجود تھے۔ کمیونٹی سے خطاب کرتے ہوئے پاکستان مسلم لیگ(ن) کی ایم این اے بیگم شکیلہ لقمان نے کہا کہ تمام تر مسائل کے باوجود مسلم لیگ(ن) کی حکومت عوام کو ریلیف دینے کے لئے سرگرم عمل ہے انہوں نے کہا کہ امریکن پاکستانی خوشحال زندگی گزار رہے ہیں انہیں چاہئے کہ وہ پاکستان میں ضرورت مندوں کی ہر ممکن مدد کریں۔ انہوں نے کہا کہ وہ پاکستان میں امریکی پاکستانیوں کی آواز بنیں گی۔

 

 

حکومت بھی خصوصاً امریکی پاکستانیوں کی پاکستان کیلئے خدمات کی معترف ہے اور اوورسیز پاکستانیوں کو گرانقدر سرمایہ سمجھتی ہے کمیونٹی استقبالیہ میں مختلف شعبہ زندگی سے تعلق رکھنے والی ممتاز شخصیات نے شرکت کی جن میں مشہور کمیونٹی شخصیت آصف بیگ‘پیپلز پارٹی یو ایس اے کے صدر شفقت تنویر مسلم ڈے پریڈ کے چیئرمین شبیر گل‘ نسیم گلگتی‘ چوہدری ظہور اختر ‘ مسلم لیگ ن امریکہ کے بانی رہنما رانا اشفاق‘ بیگم الزبتھ اشفاق  ان کے علاوہ ناسا کاﺅنٹی کی کلرک نسرین احمد‘ بیگم شکیلہ چوہدری کے شوہر مسلم لیگ ن یو ایس اے کے سابق ڈاکٹر خالد لقمان‘ سلیم ملک‘ مسعودکمبوہ ‘ راجہ رزاق وغیرہ شامل تھے۔ پاکستان کی مایہ ناز گلو کارہ طاہرہ سید بھی خصوصی طور سے مدعو تھیں۔

 

رانا اشفاق نے سفیر جلیل عباس جیلانی سے اس موقع پر ملاقات کے دوران انہیں امریکہ میں پاکستان مسلم لیگ ن امریکہ کےساتھیوں کی تاریخ کے بارے میں آگاہ کیا ۔ انہوں نے سفیر جیلانی سے کہا کہ وہ ان کی قیادت میں لیگی ساتھی اور کمیونٹی ارکان امریکہ میں پاکستا ن کے سبز ہلالی پرچم کو سربلند کرنے میں اپنا ہر ممکن کردار ادا کریں گے ۔ اس موقع پر رانا اشفاق کے ساتھ ان کی اہلیہ الزبتھ اشفاق بھی موجود تھیں ۔


 

تاریخ اشاعت : 2014-07-03 00:00:00
مقبول ترین خبریں
امیگریشن خبریں
SiteLock