اوورسیز پاکستانی کمیونٹی کے لئے پاکستان میں ہونیوالی ترقی کا دورخوش آئندہ اور حوصلہ افزاءہے ، میاں فیاض کی لاہور میں وزیر اعلیٰ میاں شہباز شریف سے ملاقات

 

شاہین بٹ اوورسیز کمیشن کو وزیر اعلیٰ کے ویژن کے مطابق چلا رہے ہیں ،پہلے سمندر پا ر پاکستانیوں کو اپنے وطن میں اس قسم کا فورم دستیاب نہیں تھا۔انور واسطی

نیویارک ، لاہور (خصوصی رپورٹ) پاکستان مسلم لیگ (ن) امریکہ کے سینئر وائس چیئرمین میاں محمد فیاض نے اپنے حالیہ دورہ پاکستان کے دوران وزیر اعلیٰ پنجاب محمد شہباز شریف سے ملاقات کی۔ اوور سیز پاکستانی کمیشن (او پی سی)پنجاب کے وائس چیئرپرسن شاہین خالد بٹ کی لاہور میں واقع رہائش گاہ پر ہونیوالی ملاقات میں سمندر پار پاکستانیوں کے مسائل کے حوالے سے تفصیلی گفتگو ہوئی۔ اس موقع پروزیر اعلیٰ پنجاب نے کہا کہ اوورسیز پاکستانیز کمیشن کا قیام حکومت پنجاب کا انقلابی اقدام ہے، جو وطن سے دور رہنے والے ہم وطنوں کے مسائل اور شکایات کے حل کے ازالے میں اہم کردار اد اکررہا ہے، انہوں نے کہا کہ پنجاب حکومت کمیشن کو آئینی حیثیت د ے چکی ہے جبکہ مسائل کے حل کیلئے حکومت کی طرف سے کمیشن کو ہر ممکن سپورٹ فراہم کی جا رہی ہے۔شہبازشریف نے کہا کہ بیرون ملک بسنے والے پاکستانی وطن عزیز کے عظیم سفیر ہیں اور انہوں نے بیرونی دنیا میں اپنی صلاحیتوں کا لوہا منوایا ہے۔ دیار غیر میں بسنے والے پاکستانیوں کے مسائل کے حل اور ان کی شکایات کے ازالہ کے لئے اوورسیز پاکستانیز کمیشن ، پنجاب قائم کیا گیا ہے، مشرق وسطیٰ ،یورپ ، امریکہ اور دیگر ملکوں میں بسنے والے پاکستانیوں کی شکایات کے فوری ازالہ کیلئے کمیشن کو بااختیار بنایا گیاہے
۔ تقریب سے خطاب کرتے ہوئے وائس چیئر پرسن شاہین خالد بٹ نے کہا کہ اوپی سی، سمندر پار مقیم پاکستانیوں کے مسائل کے حل کیلئے سر گرم عمل ہے اور اوورسیز پاکستانی اپنی کسی بھی مشکل کے ازالے کیلئے ادارے سے رجوع کرسکتے ہیں۔انہوں نے کہا کہ سمندر پار مقیم پاکستانیوں کی شکایات کے فوری ازالے کیلئے انفارمیشن ٹیکنالوجی کا بھرپور استعمال کیا جا رہا ہے اور شکا یات پر ہونے والی کارروائی کو کمپلینٹ ویب پورٹل پرباقاعدگی سے اپ لوڈ کیا جاتا ہے۔
اس موقع پر وائس چیئرمین پی ایم ایل این (امریکہ) میاں فیاض نے کہا کہ پاکستان مسلم لیگ ن امریکہ نے جمہوریت کی خاطر بے پناہ قربانیاں دی ہیں اور آمرانہ ادوار میں بھی ڈکٹیٹرز کے سامنے سر تسلیم خم نہیں کیا، انہوں نے کہا کہ ڈیڑھ عشرے پر محیط جلا وطنی کے تاریک دور میں اپنے قائدین کا ہر موقع پر ساتھ دیا جس پر فخر ہے۔ وائس چیئرمین پی ایم ایل این (امریکہ) نے مزید کہا کہ سمندر پار پاکستانیوں کو اپنے ہی وطن میں متعدد مسائل کا سامنا ہے جن کے حل کیلئے اوور سیز پاکستانی کمیشن نہایت فعال کردار ادا کر رہا ہے۔
پی ایم ایل این امریکہ کے سیکرٹری اطلاعات سید انور واسطی نے وائس چیئرمین پرسن شاہین خالد بٹ کے کام کی تعریف کی اور سمندر پار پاکستانیوں کیلئے ان کی خدمات کو سراہا۔انہوں نے کہا کہ وائس چیئرمین پرسن اوور سیز پاکستانی کمیشن کو وزیر اعلیٰ کے ویڑن کے مطابق چلا رہے ہیں جہاں سائل کی شکایات کا بر وقت ازالہ کیا جا رہا ہے، قبل ازیں سمندر پا ر پاکستانیوں کو اپنے وطن میں اس قسم کا فورم دستیاب نہیں تھا۔

 

 


تاریخ اشاعت : 2017-01-21 00:00:00
مقبول ترین خبریں
امیگریشن خبریں
SiteLock