اوورسیزپاکستانیوں کے مقدمات کو فاسٹ ٹریک پر سنا جائے گا ، چیف جسٹس لاہور ہائی کورٹ

 

 

چیف جسٹس لاہور ہائی کورٹ سید منصور علی شاہ کا اوورسیز پاکستانیز کمیشن پنجاب کے وفد سے ملاقات کے موقع پر اظہار خیال


لاہور20 جون-:۔۔۔چیف جسٹس لاہور ہائی کورٹ مسٹر جسٹس سید منصور علی شاہ سے اوور سیز پاکستانیز کمیشن(او پی سی)پنجاب کے وفد نے ملاقات کی،
وفد کی قیادت کمیشن کے وائس چیئرپرسن شاہین خالد بٹ ا ورکمشنر افضال بھٹی کر رہے تھے جبکہ ارکان میں ڈائریکٹر جنرل جاوید اقبال بخاری اور ڈائریکٹر لیگل راجہ زبیر بھی شامل تھے۔ اس موقع پر ڈائریکٹر جنرل ڈسٹرکٹ جوڈیشری محمد اکمل خان اور سیکرٹری ٹو چیف جسٹس شاہد شفیع بھی موجودتھے۔


اوورسیز پاکستانیز کمیشن کے وائس چیئرپرسن اور کمشنر نے چیف جسٹس سید منصور علی شاہ کو لاہور ہائی کورٹ اور ضلعی عدلیہ میں اوورسیز پاکستانیوں کے زیر التواء مقدمات سے متعلق آگاہ کیا اور اس حوالے سے دیگر درپیش مسائل بتائے۔ فاضل چیف جسٹس نے کہا کہ اس وقت اوورسیز پاکستانیوں کے 262 مقدمات زیر التواء ہیں جبکہ گزشتہ چھ مہینوں میں 66 مقدمات کا فیصلہ کیا گیا ہے۔ فاضل چیف جسٹس نے مزید کہا کہ لاہور ہائی کورٹ میں زیر التواء مقدمات کیلئے ایک خصوصی بنچ تشکیل دیا جا رہا ہے جبکہ صوبہ بھر کے ہر ضلع میں دو دو عدالتیں مختص کی جارہی ہیں جن میں ایک ٹرائل کورٹ جبکہ دوسرے ایپلیٹ کورٹ کے طور پر کام کرے گی اور مقدمات کو فاسٹ ٹریک پر سننے کی ہدایات بھی جاری کی جارہی ہیں۔ فاضل چیف جسٹس نے کمیشن سے کہا کہ وہ ایک فوکل پرسن نامزد کریں جو اس معاملہ میں عدالت عالیہ سے رابطے میں رہے، مزید برآں ڈی جی ڈسٹرکٹ جوڈیشری اور ڈی جی اوورسیزپاکستانیزکمیشن بھی مہینے میں ایک بار ضرور میٹنگ کریں گے اورلاہور ہائی کورٹ کی جانب سے جاری ہدایات پرعملدر آمدکا جائزہ لیں گے۔فاضل چیف جسٹس نے کمیشن کے حکام سے کہا کہ وہ اگست میں دوبارہ آئیں اوراوورسیز پاکستانیوں کے مقدمات کے حل کیلئے اٹھائے جانے والے اقدامات کے حوالے سے آگاہ کریں۔ اس موقع پر کمیشن کے وائس چیئرپر سن شاہین خالد بٹ اور کمشنر افضال بھٹی نے فاضل چیف جسٹس کا شکریہ ادا کیا اوراوورسیزپاکستانیوں کی سہولت کیلئے فوری اقدامات اٹھانے کو سر اہتے ہوئے کہا کہ ضلعی عدالتوں کو اوورسیز پاکستانیوں کے کیسوں کے جلد فیصلے کی ہدایات سے زیر التواء مقدمات کو نمٹانے میں خاطر خواہ مدد ملے گی۔ انہوں نے کہا کہ سمندر پار مقیم پاکستانی تھوڑے عرصے کیلئے ملک آتے ہیں اور انکے مقدمات کے جلد فیصلے سے انہیں نمایاں ریلیف مل سکتا ہے۔قبل ازیں شاہین خالد بٹ اور افضال بھٹی نے فاضل چیف جسٹس کو کمیشن کی کارکردگی اور اوورسیز پاکستانیوں کی شکایات کے ازالے کیلئے کئے جانے والے اقدامات کی تفصیل سے بھی آگاہ کیا۔۔

تاریخ اشاعت : 2017-06-21 00:00:00
مقبول ترین خبریں
امیگریشن خبریں

SiteLock