پاکستانی امریکن کمیونٹی کی نیویارک میں بلوچستان مخالف اشتہاری پروپیگنڈہ مہم کی شدید مذمت

 

نیویارک میں پاکستانی امریکن کمیونٹی کی آل پارٹیز کانفرنس، بلوچستان سمیت پاکستان بھر کے عوام کے ساتھ اوورسیز پاکستانی کا مکمل یکجہتی کا اظہار
یقین دلاتے ہیں کہ پاکستان ، پاکستانی عوام یا ملک کے کسی بھی مخصوص حصے یا قوم کے خلاف کسی پاکستان مخالف یا بھارتی سازشی عناصر کی سازش کامیاب نہیں ہونے دیں گے

 

پاکستانی کمیونٹی ہر بار کی طرح اس بار بھی اکٹھی اور متحد ہو گئی ہے اور انشاءاللہ اپنا ہر ممکن کردار ادا کرکے اس سازش کا مردانہ وار مقابلہ کرے گی، آل پارٹیز کانفرنس نیویارک کا اعلامیہ

نیویارک (خبریں ، چینل فائیو نیوز) پاکستانی امریکن کمیونٹی کی جانب سے نیویارک سٹی میں ییلو کیب اور بعض پبلک مقامات پر بلوچستا ن کے خلاف اشتہاری پروپیگنڈہ مہم کی شدید الفاظ میں مذمت کی گئی ہے ۔ اس سلسلے میں نیویارک میں پاکستانی امریکن کمیونٹی کی آل پارٹیز کانفرنس منعقد ہوئی جس کے انعقاد میں کمیونٹی رہنما و اسسٹنٹس پروائیڈر برائے اوورسیز پاکستانی کمیشن ظہیر احمد مہر اور انکے ساتھیوں نے کردار ادا کیا ۔

 

کانفرنس میں متفقہ طور پر قرار داد منظور کی گئی جس میں نیویارک سٹی میں ییلو کیب اور بعض پبلک مقامات پر شرانگیز ، نفرت انگیز اشتہاری پروپیگنڈہ مہم کی شدیدالفاظ میں مذمت کی گئی، نیویارک سٹی ، سٹیٹ اور فیڈرل حکام سے مطالبہ کیا گیا کہ وہ ایسی نفرت انگیز مہم کا نوٹس لیں ۔

 

قرار داد میں کہا گیا کہ بلوچستان سمیت پاکستان بھر کے عوام کے ساتھ اوورسیز پاکستانی اپنی مکمل یکجہتی کا اظہار کرتے ہیں اور انہیں یقین دلاتے ہیں کہ پاکستان ، پاکستانی عوام یا ملک کے کسی بھی مخصوص حصے یا قوم کے خلاف کسی پاکستان مخالف یا بھارتی سازشی عناصر کی سازش کامیاب نہیں ہونے دیں گے اور ایسی سازشوں کا ڈٹ کر مقابلہ کریں گے ۔

آل پارٹیز کانفرنس میں ظہیر احمد مہر (پاکستانی امریکنز آف نیویارک ) ، فاروق مرزا(فورتھ پلر)، سید المدار حسین شاہ (ہیومین رائٹس فار اوورسیز)، طاہر میاں (پاکستانی امریکن کمیونٹی آف نیویارک )، سید فضل حق ، کرنل (ر) مقبول ملک ( پاکستانی امریکن سوسائٹی آف نیویارک ) ، اسلم ڈھلوں (پاکستانی امریکن ایسوسی ایشن آف نیویارک) ، فائق صدیقی (کالم نویس ، اینکر پرسن ، دانشور) ، سلیم احمد ملک (پاکستانی امریکن تھنک ٹنک) ، ہمایوں شبیر (پاکستانی امریکن کمیونٹی آف لانگ آئی لینڈ) ،شیخ شکیل احمد (مسلم کولیشن آف نیویارک ) ، شیخ عامر (ہیومین رائٹس فار اوورسیز پاکستانیز) ، شیخ توقیر الحق(اے پی اے سی) ، ولیم شہزاد، جیمز سپرئین ( پاکستانی امریکن کرسچئین ایسوسی ایشن ) ، صالح سمیع (پاکستانی امریکنز آف نیویارک ) ، وسیم سید(پاکونی) سمیت کمیونٹی کے مقامی ارکان شریک ہوئے ۔

کانفرنس میں بتایا گیا کہ نیویارک میں جس ٹیکسی گیراج کی ییلو کیب پر بلوچستان مخالف پوسٹرز لگائے گئے تھے ، ان کی انتظامیہ سے بات کرکے کمیونٹی کی تشویش سے آگاہ کیا گیا اور انہیں یقین دلایا گیا کہ ایسے پوسٹرز ٹیکسیوں سے اتار دئیے جائیں گے ۔ اسی طرح نیویارک کے پاکستانی امریکن ٹیکسی ڈرائیوز نے بھی اعلان کیا ہے کہ وہ کوئی ایسی ٹیکسی ڈرائیو میں کریں گے کہ جس پر پاکستان مخالف کوئی زہریلا یا سازشی پروپیگنڈہ کیا ہو ۔

آل پارٹیز کانفرنس کے شرکاءکا کہنا تھا کہ جن سازشی عناصر نے زہریلا پروپیگنڈہ کرنے کی کوشش کی ہے ، انہیں معلوم ہونا چاہئیے کہ ایسے واقعات کے بعد پاکستانی کمیونٹی ہر بار کی طرح اس بار بھی اکٹھی اور متحد ہو گئی ہے اور انشاءاللہ اپنا ہر ممکن کردار ادا کرکے اس سازش کا مردانہ وار مقابلہ کرے گی۔

آل پارٹیز کانفرنس میں جیوے پاکستان ، جیوے بلوچستان ، جیوے پنجاب ، جیوے خیبر پختونخوا، جیوے سندھ ، جیوے گلگت بلتستان اور جیوے کشمیر کے نعرے لگائے گئے ۔

تاریخ اشاعت : 2017-12-28 00:00:00
مقبول ترین خبریں
امیگریشن خبریں
SiteLock