تحریک انصاف : رانا جاوید نے ”نیویارک یونائیٹڈ “ کے نام سے پینل کا اعلان کردیا

نیویارک (اردونیوز ) پاکستان تحریک انصاف نیویارک کے انٹرا پارٹی الیکشن کے سلسلے میں پارٹی رہنما و تحریک انصاف نیویارک کے سابق صدر رانا جاوید نے اپنے پینل کے اہم عہدیداروں کا اعلان کردیا ہے۔ رانا جاوید نے اپنے ساتھیوں کے ہمراہ کباب جی ریسٹورنٹ لانگ آئی لینڈ میں مشترکہ پریس کانفرنس سے خطاب کے دوران کہا کہ وہ ”نیویارک یونائیٹڈ “ کے نام سے تحریک انصاف نیویارک کے انٹرا پارٹی الیکشن میں حصہ لیں گے ۔ اس الیکشن میں وہ بطورصدر امیدوار ہوں گے جبکہ ان کے ساتھ دیگر امیدواروں میں قیصر بھٹہ سیکرٹری جنرل ، میاں توحید اللہ انفارمیشن سیکرٹری ، میاں راشد اسلام جوائنٹ سیکرٹری اور حنا رحمان وومین ونگ کی سیکرٹری کی امیدوار ہوں گی ۔اس موقع پر ان کے ساتھ مظہر سلیم باگھڑیاں ، الیاس میتلا، نعیمہ سلطانہ ، ارم نوشین ، طارق مغل ، ملک سجاد، شاہد اکبر، آصف ملک ، اجمل خان ، سیدہ شبانہ حسین ، آصفہ مغل ، صفورہ وسیم بھی موجود تھے ۔
تقریب کا آغاز تلاوت قرآن مجید سے ہوا۔ میاں توحید اللہ نے قرآن مجید کی آیات کی تلاوت کی سعادت حاصل کی ۔رانا جاوید نے خطاب کرتے ہوئے کہا کہ پی ٹی آئی کے انٹرا پارٹی الیکشن ہونے جا رہے ہیں ۔ ہم نے اس الیکشن میں بھرپور طریقے سے حصہ لینے کا فیصلہ کیا ہے۔ ہم نیویارک یونائیٹڈ کے نام سے الیکشن لڑیں گے۔انہوں نے کہا کہ اللہ کے فضل سے ہماری پوزیشن بہت اچھی ہے اور ہم پارٹی ساتھیوں کے ساتھ ملکر الیکشن جیتیں گے ۔

قیصر بھٹہ نے خطاب کرتے ہوئے کہا کہ ہم رانا جاوید کے ساتھ اس لئے کھڑے ہوئے ہیں کیونکہ ہم سمجھتے ہیں کہ جیسے پہلے رانا جاوید نے نیویارک میں پارٹی کو قیادت فراہم کی تھی ، ویسے ہی آج بھی وہ تحریک انصاف نیویارک کے صدر کے لئے موزوں اور بہترین امیدوار ہیں ۔ پارٹی کے تمام نظریاتی ساتھیوں کو رانا جاوید کا ساتھ دینا چاہئیے ۔انہوں نے کہا کہ ہم ان تمام ساتھیوں کے شکر گذار ہیں کہ جو آج ہمارے ساتھ کھڑے ہوئے ہیں اور انہوں نے ہمیں یقین دلایا ہے کہ وہ ہمارے دست و بازو بنیں گے ۔ انہوں نے کہا کہ الیکشن میں پارٹی ساتھی ، اپنا ووٹ ڈالتے وقت اس بات کا خیال رکھیں کہ پارٹی کو اس کے نظریاتی ، پرانے ساتھی قیادت فراہم کریں ۔

Rana Javed, PTI New York elections 2021